بوصف بسيط تقدر تبدأ
النماذج دلوقتي بقت قوية جدا. ممكن تفتح ChatGPT أو Gemini وتكتب وصف بسيط للصورة اللي في دماغك، وتطلع لك صورة أو تصميم احترافي من غير خبرة في Photoshop ومن غير كاميرا فخمة.
قول له مثلا: «اعمل لي صورة كرتونية لأطفال بملابس رواد فضاء على كوكب باسم مدرسة الزهور»، وهو هيبدأ معاك. مش مطلوب منك من أول مرة تحفظ مكونات Prompt طويلة أو تستخدم كلمات تقنية كتير.
لو النتيجة الأولى عجبتك، تمام. ولو عاوز تحكم أكتر أو نفس الجودة تتكرر في مجموعة صور، وقتها تبدأ تزود التفاصيل:
- الصورة معمولة لمين؟
- هتستخدمها في إيه؟
- إيه أهم عنصر لازم يظهر فيها؟
- عاوزها واقعية ولا مرسومة؟
- هتنشرها فين أو هتطبعها على إيه؟
لو أنت معلّم مثلا، ممكن تبدأ بطلب بسيط عن الفضاء. وبعد ما تشوف النتيجة، توضّح إنك عاوز غلاف لنشاط مدرسي لأطفال عمرهم عشر سنين، يظهر فيه مجموعة أطفال بملابس رواد فضاء، بأسلوب كرتوني بسيط، مع مساحة واضحة لاسم المدرسة وعنوان النشاط.
أنت مش بتوصف شكل حلو وخلاص، أنت بتحدد الصورة معمولة لمين وهتستخدمها في إيه.
3 طرق تعمل بيها صورة
قبل ما تختار النموذج أو تكتب الـPrompt، حدّد أنت داخل تعمل إيه. في المحاضرة استخدمنا تلات طرق أساسية.
1. من نص لصورة
أنت عندك فكرة، وبتحوّلها لوصف مكتوب، والنموذج يبني الصورة من الصفر. دي مناسبة لما تكون الفكرة موجودة في دماغك، لكن مفيش صورة جاهزة تعبّر عنها.
ممكن تعمل بيها غلاف، مشهد تعليمي، إعلان، شخصية خيالية، Thumbnail أو Illustration.
ده مثال جاهز. انسخه زي ما هو، أو عدّل النص على شغلك.
عرض الطلب كامل
2. من صورة لصورة
هنا أنت مش بتبدأ من مساحة فاضية. بترفع صورة، وبعدها توضّح للنموذج وظيفتها.
- Reference للستايل: عاجبك أسلوب الرسم أو توزيع العناصر أو الألوان.
- عنصر لازم يظهر: منتج، شخصية، لوجو أو صورة شخصية.
- صورة محتاجة تعديل: عاوز تغيّر الخلفية، تحذف عنصر، تعدّل المقاس أو تضيف كتابة.
- أكتر من مرجع: صورة للشخصية، وصورة للمنتج، وصورة تالتة للستايل المطلوب.
أهم حاجة متفترضش إن النموذج هيفهم وظيفة كل صورة لوحده. قول له بوضوح: «استخدم الصورة الأولى للشخصية، والتانية للمنتج، والتالتة كمرجع للألوان والستايل».
3. من صورة لنص
دي الحركة العكسية. بدل ما تكتب Prompt عشان يطلع لك صورة، ارفع صورة عاجباك واطلب من النموذج يحللها ويكتب لك وصف يساعدك تعمل نتيجة قريبة منها.
ده مثال جاهز. انسخه زي ما هو، أو عدّل النص على شغلك.
عرض الطلب كامل
الهدف هنا مش إنك تنسخ شغل حد. الهدف إنك تفهم إيه اللي عجبك في الصورة وتحوّله لتوجيهات واضحة تقدر تستخدمها في فكرة تخصك.
النموذج ممكن تلاقيه في أكتر من موقع
خلينا نفرّق بين نموذج الصور والموقع اللي بتستخدمه منه.
عندك مثلا نموذج الصور بتاع ChatGPT، وعندك نماذج Nano Banana بتاعة جوجل. نفس النموذج ممكن يكون متوفر في الموقع الأساسي، وممكن تلاقيه في موقع أو أداة تانية.
نماذج Nano Banana تقدر تستخدمها من Gemini، وتقدر تستخدمها كمان من Google Flow. وFlow هنا مش نموذج صور مختلف عن Gemini، ده مكان تاني من جوجل بيوفر لك نفس عيلة نماذج الصور، بشكل مناسب للمشاريع والصور والفيديوهات.
ونموذج الصور بتاع ChatGPT تقدر تستخدمه من ChatGPT، وممكن تلاقي مواقع تانية موفراه للاستخدام.
متخليش أسماء المواقع تشتتك. ركّز أنت بتستخدم أنهي نموذج، وهل النتيجة مناسبة لك ولا لأ.
ابدأ بالموقع الأسهل لك. اكتب وصفك، شوف النتيجة، وعدّل عليها بالمحادثة. لو عاوز تعمل مشروع فيه صور كتير أو تكمل بعد كده للفيديو، ممكن تشتغل من Flow. ولو مرتاح في ChatGPT أو Gemini، كمل من نفس المكان عادي.
الواجهات، الحدود المجانية والكريديت بتتغير مع الوقت، لكن الفكرة الأساسية واحدة: اكتب، جرّب، عدّل، وحمّل النتيجة اللي تناسب استخدامك.
نتيجة أحسن تقدر تكررها
الوصف البسيط كفاية عشان تبدأ، والنماذج دلوقتي قادرة تطلع منه نتائج ممتازة. الجزء الجاي مش شرط عشان تعمل أول صورة، استخدمه لما تكون عاوز نتيجة أدق، أو شخصية ثابتة، أو مجموعة تصميمات تحافظ على نفس الجودة والستايل.
مش محتاج تحفظ تركيبة طويلة كأنها قانون. كل ما تحتاج تحكم أكبر، جاوب على الأسئلة اللي تفرق في نتيجتك.
1. إيه نوع النتيجة؟
قول من البداية: صورة واقعية، Illustration، Poster، Infographic، غلاف، Thumbnail، Carousel أو تصميم تعليمي.
2. مين أو إيه العنصر الأساسي؟
اوصف الشخصية أو المنتج أو الفكرة الأساسية. لو شخصية: السن، الملابس، التعبير والحركة. لو منتج: الشكل، اللون، الخامة والتفاصيل اللي مينفعش تتغير.
3. بيعمل إيه وفين؟
المشهد مش شخصية واقفة في فراغ. وضّح الحركة والمكان والخلفية والعناصر المهمة حواليها.
4. إيه الستايل؟
واقعي، كرتوني، Clay، Watercolor، 3D، Editorial أو Minimal. ولو الوصف صعب، ارفع Reference وقول بالظبط إيه اللي عجبك فيه.
5. الإضاءة والألوان
حدد الجو العام: ألوان مبهجة للأطفال، ألوان هادئة ومهنية، إضاءة صباحية، إضاءة سينمائية، أو ألوان البراند.
6. المقاس والاستخدام
قول الصورة هتروح فين: Story، بوست، YouTube، شاشة عرض، ورقة مطبوعة أو غلاف. لو عارف النسبة اكتبها: 1:1 أو 4:5 أو 9:16 أو 16:9.
7. الكتابة جوه التصميم
لو عاوز كلام جوه الصورة، اكتبه بالحرف بين علامتين تنصيص، وحدد مكانه وأهميته. ولو المحتوى طويل، الأحسن تثبّت النص الأول وبعدين تطلب التصميم، لأن جودة الصورة مش ضمان إن كل معلومة مكتوبة صح.
قالب عملي
انسخ الطلب زي ما هو، أو خصّصه بتفاصيلك الأول.
خصّص الطلب على شغلكاختياري: اكتب تفاصيلك والطلب يتظبط لوحده
عرض الطلب كامل
مش لازم تستخدم كل خانة في كل مرة. استخدم اللي فعلا يفرق في الصورة.
الـReference بيختصر وصف طويل
ساعات تشوف تصميم على Pinterest ويعجبك الخط أو طريقة توزيع العناصر أو شكل الشخصيات. مهما وصفت، ممكن النموذج يطلع بعيد عن اللي في دماغك. هنا الصورة المرجعية بتختصر عليك الطريق.
لكن لازم تقول: عاوز ياخد منها إيه؟ لو رفعت صورة Infographic عن الشاي وقلت بس: «اعمل واحدة عن اللبن»، ممكن النموذج يقلّد عناصر أنت مش محتاجها أو يغير معلومات مهمة.
ده مثال جاهز. انسخه زي ما هو، أو عدّل النص على شغلك.
عرض الطلب كامل
التغذية البصرية مش نسخ
كل ما تشوف تصميم يعجبك، اسأل نفسك: هل اللي عجبني الألوان؟ الخط؟ الفراغات؟ شكل الأيقونات؟ تكوين الصورة؟ ولا طريقة عرض المعلومة؟
لما تحدد العنصر، تقدر تستخدمه كمرجع من غير ما تحول شغلك لنسخة من التصميم الأصلي.
ولو التصميم فيه لوجو، علامة مائية أو هوية لجهة تانية، متطلبش تشيلها عشان تستخدم نفس التصميم كأنه شغلك. استخدمه كمرجع، واعمل تصميم جديد بهويتك ومحتواك.
اختار المقاس من البداية
الصورة المربعة، الـStory، Thumbnail اليوتيوب والبوستر المطبوع مش نفس الحاجة. لو سيبت المقاس للنموذج وبعدين حاولت تقص الصورة، ممكن تقطع العنصر الأساسي أو تخسر المساحة اللي كنت هتكتب فيها.
| الاستخدام | نسبة شائعة |
|---|---|
| بوست مربع | 1:1 |
| بوست رأسي | 4:5 |
| Story أو Reel Cover | 9:16 |
| YouTube Thumbnail أو شاشة عرض | 16:9 |
دي نسب شائعة، مش قوانين ثابتة. لو المنصة أو المطبعة طالبة مقاس محدد، استخدم المقاس اللي طالباه.
كمان فكر في المساحة قبل التوليد. لو هتضيف عنوان ناحية اليمين، اطلب من النموذج يسيب يمين الصورة هادي وفاضي نسبيا. الفراغ هنا مش عيب، ده جزء من التصميم.
العربي محتاج مراجعة زيادة
نماذج الصور بقت أحسن في كتابة النصوص، لكن لسه ممكن حرف يتبدل، كلمة تتكرر، أو ترتيب التصميم يطلع من الشمال لليمين.
- اكتب النص النهائي بنفسك قبل ما تطلب الصورة.
- اطلب صراحة إن التصميم يكون من اليمين للشمال.
- قلّل كمية الكلام جوه الصورة.
- راجع كل حرف، رقم واسم قبل النشر.
- لو النص أساسي أو طويل، استخدم النموذج يطلع لك الخلفية والعناصر، وبعدها ضيف الكتابة في أداة تصميم تديك تحكم أدق.
في Infographic تعليمي، متراجعش الإملاء بس. راجع المعلومة نفسها، لأن النموذج ممكن يعمل تصميم حلو جدا وفيه معلومة ناقصة أو عنوان في المكان الغلط.
عدّل النتيجة بدل ما تبدأ من الصفر
الذكاء الاصطناعي مش بس بيعمل لك صورة جديدة. تقدر ترفع صورة موجودة عندك وتطلب منه يعدّلها بالشكل اللي أنت محتاجه.
ممكن تعلي جودة الصورة ووضوحها، تظبط الإضاءة والألوان، تقلل التشويش، تحذف شخص أو عنصر مش عاوزه، تغيّر الخلفية، أو تصلّح صورة قديمة فيها خدوش وتفاصيلها مش واضحة.
ده مثال جاهز. انسخه زي ما هو، أو عدّل النص على شغلك.
عرض الطلب كامل
ابدأ بطلب بسيط، شوف النتيجة، وبعدها زوّد التفاصيل اللي النموذج مفهمهاش. ولو الصورة مهمة، خليه يعمل التعديل في نسخة جديدة عشان يفضل الأصل معاك.
أول صورة مش لازم تكون النهائية. اتعامل معاها كمسودة بصرية. لو الصورة قريبة من المطلوب، اطلب تعديل واحد واضح في كل مرة:
- غيّر الخلفية بس وخلي الشخصية زي ما هي.
- وسّع المساحة اللي فوق في الصورة عشان العنوان.
- حافظ على كل العناصر وغيّر المقاس لـ4:5.
- صحّح الجملة المكتوبة.
- احذف العناصر الصغيرة المشتتة.
امتى تبدأ من جديد؟
ابدأ من جديد لو الفكرة الأساسية نفسها غلط: زاوية الكاميرا، تكوين المشهد أو اختيار الستايل. لكن لو المشكلة عنصر زيادة أو نص أو لون، التعديل غالبا أسرع.
بعد كل نسخة راجع الوجوه، الأيدي، الكتابة، اللوجو، المنتج وأي عنصر لازم يفضل ثابت.
من صورة واحدة لمحتوى كامل
الاستخدامات ملهاش حدود تقريبا، وكل ما تبص لشغلك أو دراستك أو حياتك هتلاقي أفكار جديدة.
للمعلم
ممكن تحول مفهوم صعب لرسم بسيط، تعمل غلاف نشاط، بطاقة مراجعة، شخصية مرتبطة بالدرس، Infographic يلخص المحاضرة، شهادات تقدير للطلبة، أو مجموعة استيكرات تستخدمها في التشجيع والمتابعة.
وممكن تحول مفهوم معين لقصة مصورة كاملة: تثبّت الشخصيات الأول، تختار الستايل، وبعدها تحول القصة لمجموعة صور مترابطة.
ده مثال جاهز. انسخه زي ما هو، أو عدّل النص على شغلك.
عرض الطلب كامل
لصانع المحتوى
ممكن تعمل هوية ثابتة لسلسلة منشورات، تصميم لمقولة، غلاف فيديو، أو Carousel يشرح فكرة على مجموعة كروت مترابطة. ولو بتعمل منشورات لمنصات مختلفة، اعمل نسخة تناسب كل مقاس وطريقة قراءة بدل ما تنشر نفس التصميم في كل مكان.
لصاحب مشروع أو منتج
ممكن تعمل صور للمنتج في أكتر من مشهد، لكن لازم تحافظ على تفاصيله الحقيقية. جهّز صور واضحة وقول للنموذج إيه اللي مينفعش يتغير: شكل العبوة، اللون، اللوجو، التطريز أو الخامة.
الصورة الحلوة كمان هي أول خطوة لفيديو حلو. لما يكون عندك صورة شخصية أو منتج واضحة، وReference منظم، تقدر تستخدمهم بعد كده في Storyboard أو مشاهد فيديو، والتفاصيل هتفضل ثابتة أكتر.
للاستخدام الشخصي
ممكن تعمل تصميم لعبارة بتحبها، دعوة، بطاقة، صورة تذكارية أو Illustration لفكرة في دماغك.
وممكن ترفع صورتك وتطلب تغيير اللبس أو الستايل، بس خلي بالك من الخصوصية، ومتستخدمش صورة أي حد في حاجة هو ما وافقش عليها.
اعمل Infographic من محتوى صحيح
الـInfographic مش مجرد صورة عليها كلام. ده طريقة تختصر بيها المعلومة وتخلي ترتيبها مفهوم من أول نظرة.
- حدّد العنوان.
- اختار من تلات لخمس أفكار أساسية.
- اختصر كل فكرة في سطر أو سطرين.
- راجع المعلومات.
- حدّد الجمهور والمقاس.
- بعد كده اطلب التصميم.
ده مثال جاهز. انسخه زي ما هو، أو عدّل النص على شغلك.
عرض الطلب كامل
اطلب من النموذج التصميم، لكن راجع المحتوى النهائي بنفسك.
الـCarousel فكرة واحدة متقسمة صح
الـCarousel مجموعة كروت ورا بعض، لكن مش معنى كده إننا نقسم فقرة طويلة على خمس صور. لازم كل كارت يكون ليه دور واضح.
- الغلاف: إزاي تعمل صورة احترافية بالذكاء الاصطناعي؟
- من نص لصورة: اكتب فكرتك وحدد الجمهور والاستخدام.
- من صورة لصورة: استخدم Reference للستايل أو عنصر لازم يظهر.
- من صورة لنص: حلّل التصميم وافهم مكوناته.
- الطلب الواضح: شخصية، مكان، حركة، ستايل، ألوان ومقاس.
- قبل النشر: راجع العربي والمعلومة والتفاصيل.
ده مثال جاهز. انسخه زي ما هو، أو عدّل النص على شغلك.
عرض الطلب كامل
Workflow بسيط لأي صورة
- حدّد الهدف: الصورة لمين وهتستخدمها فين؟
- اجمع المحتوى: النص والمعلومة والبيانات الصحيحة.
- اختار الطريقة: نص لصورة، صورة لصورة، أو تحليل صورة لنص.
- جهّز المراجع: ستايل، شخصية، منتج أو ألوان.
- اكتب الطلب: ركّز على التفاصيل اللي بتغيّر النتيجة فعلا.
- اختار المقاس: قبل ما تولّد الصورة.
- ولّد أكتر من محاولة: وقارن بدل ما تتمسك بأول نتيجة.
- عدّل: صلّح عنصر واحد واضح في كل مرة.
- راجع: العربي، المعلومة، التفاصيل والحقوق.
- صدّر النسخة النهائية: بالجودة والمقاس اللي يناسبوا استخدامك.
لو النتيجة مش حلوة، متنقلش على طول لأداة جديدة. اسأل الأول: هل المشكلة في الأداة، ولا في إن الهدف والمرجع والمقاس مش واضحين؟
تاسك المحاضرة: اعمل صورة تستخدمها فعلا
المطلوب تعمل صورة واحدة على الأقل لحاجة حقيقية في شغلك، دراستك أو حياتك. ممكن تكون تصميم تعليمي، Infographic، غلاف فيديو، Carousel، صورة منتج، قصة مصورة قصيرة أو حتى تصميم لعبارة بتحبها.
خطوات التنفيذ
امشي على خطوات الـWorkflow اللي فوق على صورة واحدة، من تحديد الهدف لحد التصدير.
هتسلّم إيه؟
ابدأ بصورة واحدة محتاجها فعلا
ابدأ بوصف بسيط، ولما تحتاج تحكم أكبر أو جودة تتكرر، زوّد التفاصيل واستخدم Reference مناسب، وعدّل جزء واحد في كل مرة.
لما تتعلم تعمل صورة حلوة وتحافظ على تفاصيلها، هتكون بنيت أساس مهم للإنفوجرافيك، الـCarousel، وتصميمات المحتوى، وبعدها الفيديوهات اللي هنشتغل عليها قدام.
مستني أشوف إبداعاتكم.خليك دايما Smarter With AI 💚