الـChat بيجاوب من مصادرك إنت
إنت مش مضطر كل مرة تسأل كل الملفات الموجودة في النوت بوك. ممكن تختار Source واحدة، مجموعة Sources، أو Label كاملة.
لو المحاضرة الأولى عندك مكوّنة من تسجيل وPDF وكتيب، اختيار الـLabel الخاصة بيها يوفر عليك تحديد كل ملف لوحده ويخلي الإجابة محصورة في المحتوى اللي تقصده.
الميزة المهمة هنا هي الـCitations. لما الإجابة تجيب معلومة من مصدر، تقدر تعرف المعلومة جت منين وترجع للمكان نفسه.
تخيل إنك أخدت كورس من سنة وفاكر إن معلومة معينة اتقالت فيه، لكن مش فاكر في أنهي محاضرة. بدل ما تعيد الكورس، اسأل النوت بوك. لو الإجابة كفاية تمام، ولو محتاج الشرح الأصلي افتح المرجع اللي ظهر مع الإجابة.
أي تسجيل ينفع يبقى مصدر
أنا برفع محاضراتي أنا كمان، لأن التسجيل بعد ما يتحول لتفريغ يفتح استخدامات كتير: أعمل منه كتيب، أعيد ترتيب الشرح، أجهز نسخة لجمهور مختلف، أو أراجع طريقة تقديمي.
أقدر أسأل: إيه اللي اتكرر؟ أنهي نقطة محتاجة مثال؟ وفين الترتيب كان ممكن يبقى أوضح؟
ونفس الفكرة مع الاجتماعات. لو التدوين أثناء الكلام بيشتتك، التسجيل — بموافقة المشاركين واحترام الخصوصية — يبقى مرجع تسأله بعد الاجتماع:
- إيه القرارات اللي اتاخدت؟
- إيه المطلوب مني قبل اللقاء الجاي؟
- مين مسؤول عن كل خطوة؟
- إيه النقاط اللي اتكررت أو لسه محتاجة حسم؟
كده التسجيل مبقاش أرشيف مقفول، بقى مكان ترجع له وتستخدمه تاني.
شارك النوت بوك، مش المحاضرة بس
لما الطالب يبقى معاه تسجيل المحاضرة والملف المكتوب جوه Notebook، يقدر يسأل عن نقطة وقفت معاه، يطلب شرح أبسط أو مثال زيادة، أو يحول نفس المحتوى لمراجعة بطريقة تناسبه.
ودي نقطة مهمة: المصدر الواحد مبقاش مربوط بطريقة شرح واحدة.
من Settings تقدر تحدد Output Language. ممكن المصدر يبقى بالإنجليزي والشرح يطلع بالعربي، أو العكس.
وتقدر تحدد في طلب معين المستوى والطول: ملخص سريع، شرح مفصل، خطوات تنفيذ، أو شرح يناسب حد مبتدئ.
خلّي النوت بوك ترد بطريقتك
في Configure Chat عندك أكتر من طريقة للتعامل:
- Default: مناسب للأسئلة العامة.
- Learning Guide: أقرب لمدرس يمشي معاك خطوة خطوة ويتأكد إنك فاهم.
- Custom: يديك مساحة تكتب الدور وطريقة الشرح اللي تناسب النوت بوك.
ممكن مثلا تقول إن النوت بوك هي المساعد التعليمي لدبلومة Smarter With AI، تعتمد على المصادر وتشرح بعربي مصري واضح. ولو النوت بوك لمادة بتتدرس بالإنجليزي، تحدد إن الشرح بالعربي والمصطلحات العلمية تفضل بالإنجليزي وسط الكلام بشكل طبيعي.
وتقدر كمان تختار طول الإجابات عشان Notebook للمراجعة السريعة متتصرفش زي واحدة معمولة للتعلم بالتفصيل.
من Customize Notebook تقدر تغير العنوان، تضيف Logo، وتكتب Summary تشرح لأي حد داخل لأول مرة المساحة دي فيها إيه وإزاي يستخدمها.
وسمّي المصادر بأسماء مفهومة، لأن أسماء الملفات العشوائية هتتعبك لما عددها يكبر.
إعدادات تستاهل تعرفها
- Notifications: تنبهك لما مخرج طويل يخلص بدل ما تفضل فاتح الصفحة.
- Usage Limits: تتابع الحدود المتاحة حسب خطتك.
- Remove Watermark: للمخرجات اللي بتدعم إزالة العلامة، حسب الخطة والتوفر.
- Delete Chat History: تمسح سجل المحادثات لما تحتاج بداية جديدة.
- Light وDark: تختار شكل الواجهة المريح لك.
Google بتطوّر الواجهة والاختيارات باستمرار، فممكن تلاقي اسم اتحرك أو ميزة بقت متاحة لخطة مختلفة. ركّز على وظيفة الإعداد، مش مكان الزرار بس.
حوّل أحسن إجابة لمصدر جديد
الـChat مش مجرد مكان للسؤال والجواب. ممكن تستخدمه عشان تحضّر المخرج قبل ما تفتح الـStudio.
بدل ما تطلب Presentation من عشر مصادر مرة واحدة، اطلب الأول هيكل الشرائح ومحتواها، راجعه وعدله، وبعدها استخدم النسخة النهائية كأساس للتصميم.
لو إجابة عجبتك، استخدم Save to Note. الميزة هنا إن الـNote تحتفظ بالـCitations المرتبطة بالإجابة. لو نسخت الكلام بإيدك في Add Note، النص هيفضل موجود لكن ارتباطه بالمراجع مش هيكون بنفس الشكل.
وبعد ما تراجع الـNote، تقدر تحولها لـSource جديدة وتعمل منها Podcast أو Mind Map أو Infographic.
- حدد المصادر المرتبطة بالسؤال.
- اطلب استخراج أو شرح الجزء اللي محتاجه.
- راجع الإجابة وافتح الـCitations المهمة.
- احفظ النسخة المفيدة باستخدام Save to Note.
- حوّل الـNote لـSource لما تكون جاهزة.
- استخدم المصدر الجديد في المخرج المناسب.
ولو النتيجة طويلة جدا، اطلبها كملف Markdown بدل رسالة ضخمة جوه الـChat. شكل التسليم جزء من الطلب، خصوصا مع التفريغات والتقارير الطويلة.
طبّق على مصدر عندك
- اختار محاضرة أو اجتماع أو فصل من كتاب جوه Notebook.
- اسأل سؤال محدد وراجع Citation واحدة على الأقل.
- اطلب إعادة شرح نفس النقطة لمستوى أو جمهور مختلف.
- احفظ أفضل إجابة باستخدام Save to Note.
- حوّل الـNote لـSource وسمّيها باسم واضح.
في المحاضرة الجاية هنبدأ نستخدم الـStudio، ونحوّل المصادر اللي جهزناها لبودكاست وفيديو بأشكال مختلفة.
