حدد هدف الفيديو والجمهور قبل كتابة السكربت
ممكن تولّد لقطة جميلة جدا، وبعدها لقطة تانية جميلة برضه، ولما تحطهم جنب بعض تلاقي إنهم مش بيحكوا نفس الفكرة. الشخصية اتغيرت، أو حركة الكاميرا ملهاش علاقة بالكلام، أو الفيديو خلص من غير ما المشاهد يفهم إنت عايز تقول إيه. عشان كده أول خطوة في الفيديو مش اختيار نموذج التوليد.
خلينا نقول إنك بتجهز فيديو قصير لشرح خدمة أو فكرة تعليمية. اكتب الرسالة الأساسية والجمهور والمدة، وبعدها جهّز السكربت. اقرأه بصوت وشوف هل مناسب للوقت. لما الكلام يبقى واضح، نقدر نقسمه للقطات ونعرف كل لقطة هتضيف إيه. وقتها اختيار الصور والمراجع والحركة يبقى له سبب، والمحاولات اللي بتصرف عليها كريدت تبقى موجهة.
حوّل السكربت لجدول لقطات: الستوري بورد
قسّم السكربت للقطات. جنب كل لقطة اكتب إيه اللي هنشوفه، وإيه الحركة اللي بتحصل، وليه اللقطة موجودة. لو بتتكلم عن مقارنة، الصورة توضح المقارنة، لو بتشرح تغيير، خلّي التغيير ظاهر.
ممكن تبدأ بوصف نصي، أو تولّد صور ثابتة تشوف بيها تسلسل الفيديو قبل ما تستهلك محاولات في التحريك. راجع إن البداية والوسط والنهاية مفهومين، وإن اللقطات مش مجرد زوايا مختلفة لنفس العنصر.
- المشهد والهدف منه.
- الشخصية أو المنتج والمكان.
- الحركة الأساسية وحركة الكاميرا لو محتاجها.
- المدة وعلاقتها بالصوت.
- الحاجات اللي لازم تفضل ثابتة من لقطة للتانية.
أدوات الفيديو
- Veo: من جوجل، وتلاقيه في Flow وفي Gemini. لقطات واقعية جدا، وبيطلّع صوت مع الصورة.
- Kling: حركة طبيعية وتحكم كويس في اللقطة.
- Seedance: بيحافظ على شكل الشخصية والتفاصيل من لقطة للتانية.
- Higgsfield وMagnific: منصات بتجمع نماذج كتير برصيد واحد. شرحناهم في شرح المنصات الإبداعية.
- CapCut: للمونتاج: تجمّع اللقطات، وتركّب الصوت والكابشن.
الأدوات دي بتتحدث كل شوية، فجرّب نفس اللقطة على أداتين وقارن.
جهّز مراجع الشخصية والمنتج قبل توليد المشاهد
لو الشخصية أو المنتج بيتكرر، جهّز صور واضحة قبل التحريك. حدّد الشكل واللبس والألوان والتفاصيل اللي مينفعش تتغير. استخدم نفس المراجع في المشاهد المرتبطة، وراجع كل نتيجة على الأصل.
اختار طريقة البداية حسب اللي معاك: وصف نصي، صورة أول فريم، أول وآخر فريم، أو مراجع للعناصر لو الأداة بتدعمها. الدعم بيختلف من نموذج للتاني، وجود صورة مرجعية لوحده مش ضمان إن كل تفصيلة هتفضل صحيحة.
اكتب طلب التوليد على حسب حركة اللقطة
اطلب المشهد المطلوب، وحدّد إيه بيتحرك وإيه ثابت. تجنّب إنك تكدّس حركات متعارضة في لقطة قصيرة. لو عايز مشهد جديد تماما، خليه لقطة منفصلة.
انسخ الطلب زي ما هو، أو خصّصه بتفاصيلك الأول.
خصّص الطلب على شغلكاختياري: اكتب تفاصيلك والطلب يتظبط لوحده
عرض الطلب كامل
بعد الموافقة على التسلسل، اطلب وصف كل لقطة على حسب النموذج اللي هتستخدمه، وجرّب لقطة أساسية قبل ما تولّد الباقي.
اجمع الفيديو وراجعه بعد التصدير
رتّب اللقطات مع الصوت. شيل الفراغات واللقطات اللي مش بتضيف معنى، وظبّط الانتقالات والموسيقى عشان الكلام يفضل واضح. لو فيه نص عربي، راجعه بعد التصدير وفي المقاس اللي الناس هتشوفه فيه.
- الفكرة مفهومة من غير شرح إضافي منك؟
- الشخصيات وتفاصيل المنتج ثابتة؟
- الصوت مسموع، والموسيقى بتخدمه؟
- الكتابة والمقاس واللقطة الأخيرة متراجعين؟
ارجع للمشكلة المحددة. لو لقطة واحدة غيّرت شكل المنتج، صلّحها هي، لو التسلسل مش مفهوم، ارجع للستوري بورد قبل توليد لقطات أكتر.
مثال: فيديو قصير لفكرة من شغلك
صيدلي عايز فيديو 30 ثانية عن حفظ الأنسولين في الصيف. كتب السكربت الأول وراجع المعلومة، وقسّمه لأربع لقطات: شنطة في الشمس، وتلاجة، وشنطة تبريد، وإيد بتقرا التعليمات. ولّد كل لقطة لوحدها، وجمعهم في CapCut مع صوته وكابشن بالكلمات المهمة.