الفرق بين إنه يشرح وإنه ينفّذ
لو سألت «إزاي أعمل شيت للفواتير؟»، هيشرح لك الخطوات وإنت تنفّذ. لكن لو قلت «دي صور 40 فاتورة، اعمل لي شيت فيه العميل والمبلغ والتاريخ»، إنت محتاج حد ينفّذ ويسلّمك الملف.
ده اسمه تنفيذ مهمة: بيقرأ ملفاتك، ويفتح المواقع والتطبيقات اللي محتاجها، ويجهّز الملف أو الشيت أو العرض، وإنت متابع.
وضع التنفيذ في كل أداة
التلات أدوات الكبار فيهم دلوقتي وضعين، بتتنقل بينهم من فوق خانة الكتابة:
| الأداة | وضع الكلام | وضع التنفيذ |
|---|---|---|
| ChatGPT | Chat | Work |
| Gemini | Chat | Task |
| Claude | Chat | Cowork |
وضع التنفيذ غالبا في الخطط المدفوعة. والفكرة في التلاتة واحدة: بتسلّمه مهمة ليها آخر، مش سؤال. ولو أول مرة تستخدم الأدوات دي، ابدأ بـشرح بداية ChatGPT أو شرح بداية Claude.
سلّمه المهمة زي ما تسلّمها لزميل جديد
تخيّل إن معاك زميل جديد أول يوم شغل. هتقول له المطلوب، والملفات فين، وعايز النتيجة شكلها إيه، وإيه اللي يرجع لك فيه قبل ما يعمله. نفس الكلام هنا.
- المطلوب: شيت فواتير شهر أكتوبر.
- الملفات: صور الفواتير المرفقة، أو فولدر معين في Drive.
- شكل النتيجة: شيت فيه العميل والمبلغ والتاريخ وحالة الدفع، والمتأخر متعلّم.
- يرجع لك في إيه: لو رقم مش واضح في الصورة، أو قبل ما يبعت أي إيميل.
انسخ الطلب زي ما هو، أو خصّصه بتفاصيلك الأول.
خصّص الطلب على شغلكاختياري: اكتب تفاصيلك والطلب يتظبط لوحده
عرض الطلب كامل
تابعه وهو شغال
وهو بيشتغل، هتشوف الخطوات اللي بيعملها. لو لقيته ماشي في اتجاه غلط، وقّفه ووجّهه، مش لازم تستنى للآخر.
ولما يخلص، افتح الملف بنفسك. قارن عينة من الأرقام بالفواتير الأصلية، واتأكد إن الإجمالي صح. جملة «خلصت» في آخر الرد مش معناها إن الشغل مظبوط.
مهام تبدأ بيها
- شيت من صور فواتير أو إيصالات.
- استفسارات العملاء من الإيميل في جدول، ومعاها مسودة رد لكل واحد.
- تقرير طويل يتحول لعرض للاجتماع وملخص صفحة.
- مؤتمرات أو كورسات في مجالك السنة دي، في جدول فيه الشروط والمواعيد والروابط.
لو المعلومات في Gmail أو Drive، اربطهم الأول. التفاصيل في شرح ربط التطبيقات.
لو المهمة نجحت وهتتكرر
احفظ الطلب اللي نجح. ولو المهمة بتتكرر، خليها تشتغل لوحدها في ميعادها كمهمة مجدولة (Scheduled action)، وده في شرح الجدولة. ولو بتستخدم Claude والمهمة ليها طريقة ثابتة، احفظها كمهارة من شرح المشاريع والمهارات.
سلّم أول مهمة
اختار مهمة صغيرة ليها آخر واضح، زي شيت من صورتين أو ملخص من تلات إيميلات. شغّلها في وضع التنفيذ، وتابعها، وافتح النتيجة وراجعها بنفسك.