ليه النتيجة بتختلف كل مرة؟
كلنا اتحطينا في موقف إن مطلوب مننا Presentation: عرض في الشغل، محاضرة هنشرحها، مناقشة، أو بورتفوليو. زمان كان الحل إنك تقعد على Google وتتعلم PowerPoint أو Canva، وده كان بياخد وقت ومجهود كبير.
دلوقتي الموضوع بقى بخطوات بسيطة، لكن في غلطة بتتكرر كتير.
ناس كتير بتكتب موضوع العرض للذكاء الاصطناعي وتقول له: «اعمل Presentation احترافية». ساعتها إنت طلبت منه حوالي ميت حاجة في طلب واحد: يجهز المحتوى، يقسمه على شرائح، يختار عنوان كل شريحة وإيه اللي جواها، يقرر هيبقى فيها صورة ولا جدول، وفي الآخر يصمم.
الأداة بتخمّن كل ده، فممكن تطلع نتيجة حلوة، وممكن تطلع حاجة بعيدة عن اللي في دماغك. ولو طلبت نفس الطلب عشر مرات، مش هتعرف كل مرة هيطلع كام شريحة، ولا الكلام هيتكتب إزاي، ولا التصميم هيبقى شكله إيه.
بين المحتوى اللي معاك والتصميم النهائي في خطوة ناس كتير بتنساها: تجهيز العرض. لما تجهزه بنفسك، إنت اللي بتحدد النتيجة، مش الأداة.
المحتوى ممكن ييجي من تلات أماكن
خلينا نبسّطها: الـPresentation هي محتوى معاك، عايز تعرضه في شكل منظم وحلو، بحيث المعلومة توصل بسهولة للي قدامك. يعني عندنا تلات حاجات: محتوى، وتجهيز للمحتوى ده، وتصميم يعرضه.
وأول سؤال: المحتوى ده جاي منين؟
- محتوى معاك: كتاب، ملف، محاضرة، أو كذا ملف عايز تحولهم لعرض واحد.
- موضوع بس: تكتب الموضوع والذكاء الاصطناعي يجهز المحتوى من معرفته.
- بحث: تطلب منه يبحث عن الموضوع ويجمع لك المعلومات، وبعدها تحولها لعرض أو تدمجها مع الملفات اللي معاك.
أي طريقة من دول تنفع. المهم إنك تعرف إن المحتوى ده لسه خام، ومش جاهز يتحول لتصميم.
جهّز مسودة الشرائح قبل التصميم
قبل ما تطلب أي تصميم، جاوب على الأسئلة اللي هتحدد شكل العرض: معمول لمين؟ هتصيغ المحتوى إزاي؟ كام شريحة؟ عايزه رسمي أكتر ولا قريب من الفئة اللي هتشوفه؟
العرض اللي بيعمله معلم لطلبة ابتدائي غير اللي بيعمله دكتور جامعة، وغير باحث بيحضّر للماجستير، وغير كاتب محتوى بيجهز بورتفوليو. كل واحد فيهم محتاج يحدد جمهوره والرسالة اللي عايز يوصلها، وعلى أساسها يظبط الأسلوب.
بعدها اطلب من الأداة مسودة بس: الشريحة الأولى عنوانها كذا وفيها كذا، التانية فيها جدول، التالتة فيها صورة. راجع الترتيب والكلام، وعدّل اللي محتاج تعديل.
انسخ الطلب زي ما هو، أو خصّصه بتفاصيلك الأول.
خصّص الطلب على شغلكاختياري: اكتب تفاصيلك والطلب يتظبط لوحده
عرض الطلب كامل
لما المسودة تعجبك، قدامك اختيارين: تقول له في نفس الشات يحولها لعرض، أو تاخدها لأي أداة تانية.
استخدمت Gemini Notebook أو ChatGPT أو Claude أو Canva، المحتوى نفسه مش هيتغير لأنه جاهز. اللي هيختلف هو الشكل بس.
عرض مرة واحدة ولا شغل بيتكرر؟
الـWorkflow ده مش لازم تمشي عليه في كل مرة. لو بتعمل عرض كل فين وفين، مش محتاج نظام ثابت ولا هوية بصرية تحافظ عليها، وTemplate جاهز هيكفيك.
لكن لو العروض جزء متكرر من شغلك، زي محاضرات بتشرحها كل أسبوع، هتحتاج كل عرض يطلع بنفس الهوية: نفس اللوجو، نفس الألوان، ونفس طريقة الكتابة. وهنا بييجي سؤال: «طب أنا مش هعرف أوصف الستايل بتاعي».
الحل سهل. ارفع عرض قديم عاجبك لأي نموذج لغوي، واطلب منه يكتب لك الـDesign System بتاعه: الألوان، الخطوط، التنسيق، وطريقة الكتابة. الدليل ده هيبقى معاك، وتقدر تستخدمه في أي أداة.
ده مثال جاهز. انسخه زي ما هو، أو عدّل النص على شغلك.
عرض الطلب كامل
خلّي الهوية ملف بيتنقل معاك
احفظ الدليل ده مع اللوجو في ملف واحد. أي أداة هتشتغل عليها، ارفع الملف ده جنب المحتوى، فتطبق نفس الهوية من غير ما تشرحها من الأول.
وممكن تاخد الفكرة خطوة كمان وتحوّل الملف ده لـSkill. أنا عندي مثلا Skill خاصة بالعروض، فيها الـDesign System بتاعي، وطريقة كتابتي، وعروض عملتها قبل كده، واللوجو. أي منصة بستدعيها فيها، بتوفر عليا وقت كبير جدا.
هتسلّم العرض بأنهي صيغة؟
أغلب أدوات العروض بتديك أكتر من صيغة، فاختار على حسب هتعمل إيه بالعرض:
- PowerPoint: لو هتعدّل عليه أو تعرضه من جهازك.
- PDF: لو هتبعته لحد يقرأه أو هتطبعه.
- Web: العرض بيبقى كأنه موقع صغير فيه أنيميشن، ومناسب لو هتشاركه بلينك.
وبعد ما العرض يطلع، غالبا هيبقى عندك تعديلات: شريحة تزودها، كلام تغيره، أو ترتيب تظبطه. اعمل تعديلاتك، وبعدها نزّله بالصيغة اللي محتاجها.
Gemini Notebook: من مصادرك لعرض
Gemini Notebook بيشتغل في حدود المصادر اللي إنت رافعها بس. بتسأله عنها براحتك، وتحوّلها لمخرجات كتير، ومنها العرض التقديمي. لما تطلب Slide Deck، هتختار:
- شكل العرض: Detailed Deck فيه كلام وتفاصيل أكتر، ومناسب لعرض حد هيقرأه لوحده. أو Presenter Slides فيه النقاط الأساسية بس، ومناسب لو إنت اللي هتشرح.
- اللغة: تقدر تختار العربي.
- الطول: قصير أو عادي أو طويل.
- المصادر: تحددها واحد واحد، أو تختار Label يجمع مصادر الموضوع كلها مرة واحدة.
- الوصف: تكتب العرض موجه لمين، وتركز على إيه، والستايل اللي عايزه.
المصادر نفسها ممكن تكون محتوى خام، فـGemini Notebook يجهزه ويصممه، أو محتوى جاهز ومتراجع، وساعتها كل المطلوب منه التصميم.
وخلي بالك إن الاستوديو ليه حدود استخدام، فلو عملت مخرجات كتير ورا بعض ممكن يطلب منك تستنى شوية.
Gemini Notebook بيصمم من المصادر اللي إنت حددتها. فالحركة الذكية إنك ترفع ملف الهوية بتاعك كمصدر، وتختاره مع المحتوى. ساعتها هياخد منه الألوان واللوجو وطريقة الصياغة.
الطريقة الأدق: المسودة كمصدر
- حدد مصادر الموضوع وملف الهوية.
- اطلب في الشات مسودة الشرائح وراجعها.
- احفظ المسودة النهائية كـNote، وبعدها حوّلها لـSource.
- اطلب Slide Deck من مصدر المسودة وملف الهوية مع بعض.
كده هيكل العرض هيفضل تحت سيطرتك، والنتيجة هتقرب جدا من اللي في دماغك.
مش هتقدر تعدّل الكلام بإيدك جوه الشرائح. هتكتب التعديل اللي عايزه في الكلام أو التصميم أو الألوان، وهو ينفذه. وتقدر كمان تمسح شرائح أو تغيّر ترتيبها، تفتح العرض وتتصفحه شريحة شريحة، تشاركه بلينك، أو تنزّله PDF أو PowerPoint.
ولو عايز تشوف إعدادات Slide Deck خطوة بخطوة، هتلاقيها في محاضرة Presentation وInfographic من كورس Gemini Notebook المجاني.
وكلاء الذكاء الاصطناعي: Genspark وManus
النموذج اللغوي العادي زي ChatGPT وGemini عامل زي مخ بيفكر ويجاوبك على قد سؤالك. لكن الوكيل أو الـAgent هو نفس المخ، بس عنده إيدين ورجلين: بتديله مهمة كاملة، وهو ينفذ خطواتها بنفسه لحد ما يوصل للنتيجة.
والعروض التقديمية من أحسن الاستخدامات اللي ظهرت فيها قوة الوكلاء من بدري. في مواقع زي Genspark وManus، أول ما تدخل على جزء العروض هتلاقي Templates كتير. بتختار التمبلت اللي عاجبك، وتديله المحتوى بتاعك، وهو يعمل لك العرض بنفس الستايل.
خلي الستايل اللي عجبك ثابت
لو عرض عجبك، تقدر تحتفظ بيه كـTemplate خاص بيك، وكل مرة ترفع محتوى جديد يطبق عليه نفس الستايل. وفي Manus مثلا تقدر ترفع Template بتاعك بصيغة PowerPoint، فيمشي على نفس الـLayouts والألوان والخطوط.
والأقوى إنك ترفع له الـSkill بتاعتك أو ملف الهوية. ساعتها هيطبق الألوان واللوجو والخطوط، وكمان طريقتك في صياغة الشرائح، من غير ما تشرح كل ده من الأول.
- التعديل: بتطلب التعديل في المحادثة، أو تنزّل الملف وتعدّل عليه بنفسك.
- التسليم: PowerPoint أو PDF، وبعض المواقع بتديك كمان نسخة Web تتعرض في المتصفح.
- الحدود: الوكلاء ليهم حد استخدام بيتجدد كل فترة، فلو عرضك كبير، جهّز المسودة الأول بدل ما تستهلك محاولاتك في التجربة.
Google Slides وCanva: لو هتعدّل بإيدك
الأدوات اللي كنا بنعمل فيها العروض زمان بقى فيها ذكاء اصطناعي جوه. الميزة الكبيرة هنا إنك في الآخر بتعدّل بإيدك على كل شريحة، مش بس بالوصف.
Gemini جوه Google Slides
- عرض كامل: تطلب منه يعمل Presentation من الصفر، أو تعمل منشن لملفات من Google Drive يحولها لعرض، وتحدد عدد الشرائح اللي عايزه.
- نفس الستايل: تختار عرض قديم عملته قبل كده، وأي شريحة أو صورة جديدة تطلع بنفس الستايل البصري.
- شريحة جديدة: تطلب شريحة واحدة قابلة للتعديل أو كصورة، وهو بيلتزم بنفس الألوان والخط اللي في عرضك، ولو عجبتك تضيفها بـInsert as new slide.
- صور وInfographic: تطلب صورة أو Infographic لشريحة معينة من نفس المكان.
- إعادة تصميم شريحة: عندك عرض قديم وعايز شكله يتغير؟ تطلب إعادة تصميم شريحة شريحة، وتقارن الجديدة بالقديمة وتختار.
الشريحة اللي بيعيد تصميمها بتطلع غالبا كصورة، يعني مش هتقدر تعدّل الكلام اللي فيها بإيدك. ولو لقيت كلمة مكتوبة غلط، اطلب منه نسخة جديدة.
كمان بعض المزايا بتنزل للخطط المدفوعة الأول، وممكن تبدأ بالإنجليزي قبل العربي، فجرّب على عرضك قبل ما تعتمد عليها.
ونفس الفكرة موجودة في Canva: الذكاء الاصطناعي يطلّع لك العرض، وبعدها تكمّل تعديل بإيدك في التصميم والخطوط والعناصر.
مش محتاج تتقن كل الأدوات
محتاج طريقة أو اتنين يطلعوا لك النتيجة اللي تناسبك. ابدأ من احتياجك:
| لو إنت محتاج | ابدأ بـ |
|---|---|
| عرض من ملفات ومصادر عندك | Gemini Notebook |
| ستايل جاهز بسرعة من غير مجهود | وكيل ذكاء اصطناعي زي Genspark أو Manus |
| تعديل يدوي كامل على كل شريحة | Google Slides أو Canva |
| نفس الهوية في كل عرض | ملف Design System أو Skill ترفعهم مع أي أداة |
الواجهات والخطط والحدود بتتغير بسرعة، لكن الطريقة ثابتة: المحتوى الأول، وبعد كده التصميم.
الـWorkflow في 4 خطوات
- المحتوى: ملفات معاك، أو موضوع تطلب من الذكاء الاصطناعي يجهزه، أو بحث يجمع لك المعلومات.
- التجهيز: حوّل المحتوى لمسودة شرائح: الجمهور، عدد الشرائح، عنوان ومحتوى كل شريحة.
- الهوية: حدد الألوان والخطوط واللوجو والستايل، بملف مرجعي أو Skill أو Template جاهز.
- التوليد والتعديل: طلّع العرض بالأداة اللي تناسبك، عدّل، ونزّله PowerPoint أو PDF.
مفيش طريقة واحدة صح وطريقة غلط. المهم توصل للنتيجة اللي عايزها بأقل مجهود وأعلى جودة.
ده مثال جاهز. انسخه زي ما هو، أو عدّل النص على شغلك.
عرض الطلب كامل
تاسك المحاضرة: اعمل عرض محتاجه فعلا
اختار عرض حقيقي محتاج تعمله: في شغلك، أو دراستك، أو محاضرة هتشرحها. بلاش موضوع عشوائي للتجربة.
خطوات التنفيذ
- اكتب في جملة واحدة: العرض معمول لمين، وعايزه يوصّل إيه؟
- جهّز المحتوى من ملفاتك أو من بحث.
- اطلب مسودة الشرائح وراجعها قبل أي تصميم.
- لو العروض شغل متكرر عندك، طلّع الـDesign System من عرض قديم عاجبك.
- اختار أداة واحدة وكمّل بيها للآخر.
- عدّل الشرائح اللي محتاجة، ونزّل العرض بالصيغة المناسبة.
هتطلع بإيه؟
ولو إنت مشترك في الدبلومة، سلّم التاسك ده في تطبيق الدبلومة عشان ناخد عليه فيدباك.
المحتوى الأول، وبعد كده التصميم
لما تقول للأداة «اعمل Presentation» وخلاص، إنت بتسيبها تخمّن كل حاجة. لكن لما تجهز المحتوى، وتحدد جمهورك، وتثبّت هويتك، أي أداة هتطلع لك نتيجة قريبة من اللي في دماغك، وتقدر تكررها.
مستني أشوف عروضكم.خليك دايما Smarter With AI 💚