ابدأ بحاجتك: عايز مساعدة في إيه؟
لو أول استخدامك لـChatGPT أو Gemini كان إنك تسأله سؤال ويجاوبك، طبيعي تفتكر إن دي كل فائدته. لكن خلينا ناخد مثال من شغلك: إنت عندك محاضرة وعايز تفهمها، أو بيانات عايز تعرضها، أو فكرة موقع مش عارف تبدأ فيه. في كل حالة من دول، ممكن تستخدم المساعد في جزء مختلف، وممكن تطلع من المحادثة بحاجة تستخدمها فعلا.
مش مطلوب تحفظ أسماء عشرين أداة. ابدأ بالحاجة اللي عايز تعملها، وشوف الأداة اللي معاك تقدر تساعدك فيها لحد فين. ممكن تخليها تقترح أفكار وإنت تكتب، وممكن تديها المحتوى والمثال اللي عاجبك وتطلب منها نسخة كاملة تراجعها. اللي هيفرق هو فهمك للمهمة، والمعلومات اللي تديهالها، وتجربتك للنتيجة.
ChatGPT وGemini وClaude بيعملوا إيه؟
لما تسمع «نموذج لغوي»، فالمقصود نظام بيشتغل على اللغة: يفهم طلبك، ويربط المعلومات، ويكتب أو يراجع. ChatGPT وGemini وClaude خدمات بتتعامل معاها بالمحادثة، وممكن يكون جواها كمان أدوات للملفات والصور والبناء والبحث.
عشان كده متحكمش على كل إمكانيات الأداة من تجربة «اكتب بوست». بص على المهمة اللي عايز تعملها، وبعدها شوف أنسب مساحة جوا الأداة. وابدأ بخدمة واحدة متاحة ليك بدل ما تفتح كل المواقع مرة واحدة.
ممكن تطلع بصورة أو ملف أو موقع أو تطبيق
خلينا ناخد درس إنت جهّزت شرحه. تقدر تطلب منه يقترح ترتيب الشرح، أو يجهّز أسئلة، أو يحول المحتوى لإنفوجرافيك. ولو عايز تطبيق تفاعلي، ممكن تبدأ بكويز أو لعبة صغيرة. ولو عايز حاجة الناس ترجع لها، اطلب كتيّب HTML يتفتح كموقع، أو ملف PDF مناسب للقراءة والطباعة.
وفي الشغل، نفس الفكرة تنفع مع تقرير أو بيانات: ملخص مكتوب لزميلك، عرض للاجتماع، أو داشبورد فيها أرقام وفلاتر. إنت تختار الشكل حسب اللي الناس محتاجة تفهمه أو تستخدمه.
الكتاب مناسب لشرح ترجع له، والعرض مناسب للكلام قدام جمهور، واللعبة مناسبة لتدريب فيه إجابة وفيدباك، والداشبورد مناسبة لأرقام وأسئلة بتتغير. مش لازم نعمل كل الأشكال لنفس الحاجة.
بناء المواقع والأدوات الخفيفة متاح عبر مساحات زي ChatGPT Sites وGemini Canvas وClaude Artifacts. كل مساحة ليها طريقة مشاركة وحدود، فجرّب الوظيفة والرابط قبل ما تقول إن النسخة جاهزة للناس.
حدد الجزء اللي هتعمله إنت واللي هيساعدك فيه
لو لسه بتتعلم كتابة المحتوى، خليه يشرح لك ويقارن بين بدايتين ويقول كل واحدة تنفع إمتى. لو إنت فاهم شغلك، اديله الجمهور والزاوية والمصادر ونماذج أسلوبك، واطلب منه يعمل الجزء اللي بياخد وقت: البحث أو ترتيب الأفكار أو أول مسودة.
ولو المهمة واضحة والمدخلات جاهزة، تقدر تطلب تنفيذ أكبر: ملف عرض، صفحة بورتفوليو، أو ملخص رسائل مرتبط بمصادره. وبعدها تراجع الناتج وتشغّل الحاجات اللي لازم تشتغل. كل ما فهمك للمهمة يزيد، توجيهك وملاحظاتك هيبقوا أدق.
لما تحتاج أكتر من محادثة
لما تبدأ تستخدمه في شغل حقيقي، هتقابل كام حاجة بتكمّل المحادثة. كل واحدة ليها شرح لوحدها:
- ربط التطبيقات: يجيب المعلومات من Gmail أو Drive بدل ما ترفعها. شرح الربط.
- تنفيذ مهمة: وضع Work في ChatGPT، وTask في Gemini، وCowork في Claude. شرح التنفيذ.
- الجدولة: مهمة تشتغل لوحدها في ميعاد. شرح الجدولة.
احفظ الطريقة اللي نجحت
لو كل مرة بتشرح له نفس الأسلوب أو نفس قواعد الشغل، احفظها مرة واحدة في Project أو كمهارة (Skill)، وارجع لها في أي وقت. الفرق بينهم وإزاي تعملهم في شرح المشاريع والمهارات.
ابدأ بمهمة صغيرة تخصك
قول للأداة عندك إيه وعايز تطلع بإيه، واطلب منها تسألك عن الناقص. جرّب النتيجة، وعدّل عليها بملاحظة محددة.