مش محتاج تكون مبرمج
زمان لو عايز موقع أو أداة صغيرة، كنت محتاج مبرمج أو تتعلم برمجة. دلوقتي إنت توصف اللي في دماغك، والذكاء الاصطناعي يكتب الكود، ويفضل يعدّل لحد ما يطلع اللي عايزه. الطريقة دي اسمها Vibe Coding.
إنت عليك الفكرة والمحتوى والتجربة. هو عليه الكود. وأمثلة تقدر تبدأ بيها:
- حاسبة تسعّر بيها شغلك أو تحسب عمولتك.
- صفحة لخدمتك أو عيادتك أو كورسك، فيها المواعيد ورابط الحجز على واتساب.
- اختبار تفاعلي للمراجعة، اللي بيحل يعرف غلطه.
- موقع بورتفوليو يعرض شغلك.
- إضافة متصفح أو تطبيق على مقاسك، وده له شرح لوحده.
اوصف اللي في دماغك
«اعمل موقع حلو» هيطلع لك موقع حلو، بس مش بتاعك. قول مين هيفتح الموقع، وهيعمل فيه إيه خطوة خطوة، والمحتوى إيه، وشكله إزاي. ولو عندك موقع عاجبك، ابعت صورة منه وقول إيه اللي عاجبك فيه.
ولو مش عارف توصف، قول الفكرة واطلب منه يسألك قبل ما يبدأ.
انسخ الطلب زي ما هو، أو خصّصه بتفاصيلك الأول.
خصّص الطلب على شغلكاختياري: اكتب تفاصيلك والطلب يتظبط لوحده
عرض الطلب كامل
أدوات تبني بيها
| لو محتاج | ابدأ بـ |
|---|---|
| أداة أو لعبة بسيطة تشاركها برابط | Gemini Canvas أو Claude |
| موقع تنشره برابط من غير خطوات | ChatGPT Sites |
| تجربة أكتر من شكل للواجهة | Google AI Studio |
| موقع كامل فيه تسجيل دخول وقاعدة بيانات ودومين | Lovable |
- Gemini Canvas: من علامة (+) اختار Canvas، واكتب طلبك. هتشوف الموقع شغال جنب المحادثة، وتشاركه من زرار Share.
- Claude: النتيجة بتطلع كـArtifact جنب المحادثة، وتقدر تعلّق على جزء معين وتطلب تعديله هو بس.
- ChatGPT Sites: يبني الموقع ويستضيفه برابط جاهز.
- Lovable: بتوصف المشروع، وهو يبنيه كموقع كامل تقدر تربطه بدومين.
استخدم أقوى موديل متاح لك، لأن الموديل الأضعف بيغلط في الكود أكتر.
عدّل جزء جزء
أول نسخة نادر ما تكون النهائية. افتحها على الموبايل وجرّبها كأنك المستخدم، وبعدين اطلب التعديلات واحد واحد: «الزرار ده مش بيعمل حاجة»، «خلّي الجدول يتقرا على الموبايل»، «شيل القسم ده».
كل ما وصفك للمشكلة يبقى محدد، التعديل بيطلع أسرع. «مش شغال» محتاجة تخمين، لكن «لما بدوس احسب والخانة فاضية، بيطلع NaN» هيتصلّح من أول مرة.
انسخ الطلب زي ما هو، أو خصّصه بتفاصيلك الأول.